سید حیدر بیات / دوکتور شفیعی کدکنی‌نین گؤزل بیر سؤزو وار. او یازیر: موطلق توپلوم‌لاردا سؤزجوک‌لره ده ظولم اولار. کدکنی‌نین نظرینجه مثلن بیر سولطانی اؤینده اونا ایکی عالمین سولطانی، تاریخین قهرمانی، بشریتین قورتاریجی‌سی کیمی سؤزلر بوش‌بوشونا هئی قوللانیلیر.
دوکتور کدکنی‌نین سؤزونه قاتیلاراق وورغولامالی‌یام کی پهلوی زامانیندان باشلاناراق ایراندا سؤزجوک‌لره ایکی قات ظولم اولوبدور. یانی هم سؤزجوک‌لر داشیدیقلاری آنلاملا رلا اوست اوسته دوشمه‌ییب هم ده تورکو سؤزجوک‌لر ده‌ییشیلیب‌ باشقا دیله سینیق سالخاق، یانلیش یونلوش بیر دورومدا چئویریلیب‌لر.
*
بیر یول قوم دا رحمتلی درنه‌ییمیزده سیاست‌دن سؤز گئتدی. دئدیم: بو درنک ده من بیات اولاراق سؤزجوک‌لری قوروماغا (ساوونماغا) حاضیر اولورام.

بو گون ده سیته‌لرده پریزیدنت احمدی نژادین سیجیلی‌نین شکیلی‌نی گؤرنده سیاسی بیر تیتریدن دوز آتیلدیم سؤزجوک‌لرین ایچینه.
پریزیدینتین سیجیلینده دوغوم یئرینی گرمسار یازیب‌دیر. او گون سایین یازیچی حسین گونئیلی به‌یله سنندج‌ده‌ن شهریار قورولتاییندان قاییداندا سنندج‌دن ساوه‌یه کیمی بیرگه گلدیک. چئشیدلی قونولاردان سؤز گئتدی. او جومله‌دن گونئیلی دئدی: گرمسارین دا آدی قیشلاق ایدی ایندی ده‌ییشیب گرمسار ائدیب‌لر.